दिक्तेल बहुमुखी क्याम्पसको अध्यक्षमा फेरि पनि रिजाल

खोटाङ, ३० असोज । दिक्तेल बहुमुखी क्याम्पसको नयाँ सञ्चालक समिति गठन गरिएको छ । वि.सं. २०३७ साल असोज १२ गते स्थापना गरिएको जिल्लाकै पहिलो क्याम्पसको बिहिबार सम्पन्न तेस्रो क्याम्पससभाबाट देवीप्रसाद रिजालको अध्यक्षतामा नयाँ सञ्चालक समिति चयन गरिएको हो ।

समितिको उपाध्यक्षमा दुर्गाजयन्ती राई, सदस्यमा कुमार आचार्य, बीणादेवी राई, टंक थापा, सुमानबाबु आचार्य, ललितकुमार राई, रामचन्द्र राई र झुलेन्द्र विश्वकर्मा सर्वसम्मत निर्वा्चित भएका छन् । रिजाल क्याम्पस सञ्चालक समितिको अध्यक्षमा दोस्रो कार्यकालका लागि दोहोरिनुभएको हो ।

चार जना मनोनित र आठ जना पदेन सदस्य भने पछि थप गर्नेगरी क्याम्पस सञ्चालक समिति गठन गरिएको छ । तेस्रो क्याम्पससभाको अवसरमा क्याम्पस सञ्चालक समितिका पूर्वअध्यक्ष, पूर्व क्याम्पस प्रमुख एवम् क्याम्पस स्थापनाका लागि महत्वपूर्ण योगदान पु¥याएका व्यक्तित्वलाई सम्मान गरिएको छ ।

सम्मानित व्यक्तित्वलाई प्रमुख अतिथि प्रतिनिधिसभा सदस्य विशाल भट्टराईले सम्मानपत्रको साथमा दोसल्ला ओढाएर सम्मान गर्नुभएको क्याम्पस प्रमुख हीरकुमार राईले बताउनुभयो । प्रदेशसभा सदस्य रामकुमार राई ‘पासाङ’, राजनीतिक दलका प्रमुख तथा प्रतिनिधि, दश वटै स्थानीय तहका जनप्रतिनिधि, कार्यालय प्रमुख लगायतको उपस्थिति रहेको कार्यक्रमका वक्ताहरुले नयाँ बनेको सञ्चालक समितिका पदाधिकारीलाई क्याम्पसको शैक्षिकस्तर सुधारमा जोड दिन सुझाव दिएका छन् ।