पूर्वी पहाडी जिल्लाकै व्यवस्थित कबर्डहलको उद्घाटन, खेलाडीहरुमा पलायो आशा

खोटाङ । जिल्लाको दिक्तेलबजारस्थित माटिकोरेमा निर्माण सम्पन्न भएको बहुउद्देश्यीय कवर्डहल उद्घाटन भएको छ । करीब आठ वर्ष लगाएर निर्माण सम्पन्न गरिएको बहुउद्देश्यीय कवर्डहल मङ्गलबार दिक्तेल रुपाकोट मझुवागढी नगरपालिकाका नगरप्रमुख दिपनारायण रिजाल र उपप्रमुख विणादेवी राईले औपचारिक उद्घाटन गरेकाहुन् ।

जिल्लाको केन्द्र मानिने दिक्तेलबजारमा निर्माण गरिएको बहुउद्देश्यीय कवर्डहल नगरपालिकाको रु एक करोड तीन लाख तीन हजार एकसय नौ रुपैया तथा जनसहभागिताबाट जम्मा भएको रु ३७ लाख ३३ हजार ८२० र रु २० लाख बराबरको श्रमदानगरि रु एक करोड ६० लाख ३६ हजार ९२९ लागतमा सम्पन्न गरिएको निर्माण उपभोक्ता समितिले जनाएको छ । चन्दा सङ्कलन र श्रमदानबाट निर्माण शुरु गरिएको कवर्डहल ८१ फिट लम्बाई, ५७ फिट चौडाई र ३५ फिट उचाईको रहेको जनाइएको छ ।

वि।सं। २०६८ सालमा निर्माणको काम थालेलगत्तै बजेट अभाव भएपछि अलपत्र बनेको कवर्डहलका लागि नगरपालिकाले आर्थिक तथा प्राविधिक सहयोग गरेको निर्माण उपभोक्ता समितिका अध्यक्ष कुमार आचार्यले बताएकाछन् ।

जिल्लामा खेलकुद क्षेत्रको विकास गर्न एउटा बहुउद्देश्यीय कवर्डहल अति आवश्यक रहेकाले लामो समयसम्म अलपत्र अवस्थामा रहेको कवर्डहल निर्माणमा सहयोग गरिएको नगरप्रमुख रिजालले बताए । “कवर्डहल अभावमा यसअघिसम्म जिल्लामा एउटा पनि इण्डोर गेम गर्न सकिएको थिएन” आगामी दिनमा फुटबल र क्रिकेट बाहेक सबै किसिमको गेम गर्न मिल्नेगरी कवर्डहल निर्माण गरिएको हो ।

बहुउद्देश्यीय कवर्डहलमा भलिबल, बास्केटबल, ब्याटमिन्टन, टेबलटेनिस, कबर्दी, डण्डीबियो, सितोरियो कराते, तेक्वान्दो लगायतका प्रतियोगिता गर्न सकिने जनाइएको छ । खेलकुदका कार्यक्रमसँगै जिल्लामा विभिन्न सङ्घ संस्थाले आयोजना गर्ने आमसभा, गोष्ठी तथा सेमिनार, बैठक समेत गर्न मिन्नेगरी एक हजार बढी मानिस अट्ने क्षमताको बहुउद्देश्यीय कवर्डहल निर्माण गरिएको हो ।

माटिकोरेमा निर्माण गरिएको बहुउद्देश्यीय कवर्डहल पूर्वी पहाडी जिल्लाकै सबैभन्दा व्यवस्थित भएको दाबी गरिएको छ । कवर्डहलभित्र फोल्डिङ सिस्टमको मञ्च, दर्शकका लागि प्याराफिट, बास्केटबल, भलिबल र ब्याडमिन्टनको छुट्टाछुट्टै कोर्ट रहने निर्माण उपभोक्ता समितिले जनाएको छ ।

खेल सञ्चालन भएको समयमा कम्तिमा पनि ४०० दर्शक अट्न सक्ने क्षमताको कवर्डहलको बाहिरपट्टी पुरुष तथा महिला सौचालय, वाथरुम, ड्रेसिङरुम लगायतका संरचना निर्माण गरिएको छ । मध्यपहाडी लोकमार्गमा पर्ने दिक्तेलबजारमा निर्माण गरिएको बहुउद्देश्यीय कवर्डहल छिमेकी जिल्ला भोजपुर, उदयपुर र सोलुखुम्बूका खेलाडीलाई समेत उपयोगी हुने अनुमान गरिएको छ ।

तत्कालीन प्रहरी नायब उपरीक्षक हाल प्रहरी वरिष्ठ उपरीक्षक टेकबहादुर तामाङको पहलमा जनश्रमदान र चन्दा संकलनबाट निर्माण शुरु गरिएको कवर्डहलका लागि तत्कालीन जिल्ला विकास समितिले रु दश लाख बजेट उपलब्ध गराएको थियो ।

तत्कालिन जिल्ला खेलकुद बिकास समितीका अध्यक्ष दिलचक्र राईको पालामा शुरु गरेको उक्त कबर्डहल बनाउने उद्देश्य प्राप्ती भएको प्रती आफ्नो धारणा सहित खुसी ब्यक्त गरेका थिए ।