प्रथम मेयर कप ब्याडमिन्टन प्रतियोगिताको उपाधि आयोजक टिमले उचाल्यो

दिवश रिजाल

खोटाङ, /दिक्तेलमा सम्पन्न प्रथम नगरपालिकास्तरीय मेयर कप ब्याडमिन्टन प्रतियोगिताको उपाधि आयोजक टिम दिक्तेल रुपाकोट मझुवागढी नगरपालिकाले जितेको छ । दिक्तेल वजार स्थित ‘खोटाङ बहुउद्देश्यीय कवर्डहल’मा बिहीबार सम्पन्न फाइनल खेलमा उदयपुरको त्रियुगा नगरपालिकालाई दुई एकले हराउँदै आयोजक दि.रु.म. न.पा.ले प्रथम उपाधि चुमेको हो ।

जीतसँगै दिक्तेल रुपाकोट मझुवागढी नगरपालिकाले नगद रु एक लाख ५१ हजारको साथमा ट्रफी, मेडल र प्रमाणपत्र हात पारेको छ । हारसँगै त्रियुगा नगरपालिकाले नगद रु ८१ हजारको साथमा ट्रफी, मेडल र प्रमाणपत्र हात पारेको छ ।

दिक्तेल रुपाकोट मझुवागढी नगरपालिकाबाट जीवन आचार्य र सुनिल जोशी तथा त्रियुगा नगरपालिका उदयपुरबाट विष्णु कटुवाल र विजित मगरबीच प्रतिस्पर्धा भएको थियो । तीन दिनसम्म सञ्चालन भएको प्रतियोगितामा संखुवासभा जिल्लाको पाँचखपन नगरपालिका र धरान उपमहानगरपालिका सुनसरीले सेमिफाइनलिष्ट टोलीको रुपमा चित्त बुझाएको छ । प्रतियोगिताको दुई सेमीफाइनलिष्ट टोलीलाई नगद रु ४१÷४१ हजारका साथमा मेडल र प्रमाणपत्र प्रदान गरिएको नगरपालिकाका प्रमुख प्रशासकीय अधिकृत शान्तिराज प्रसाई ले जानकारी दिनुभयो ।

पाँचखपन नगरपालिकाबाट गौरव दाहाल र अनिष श्रेष्ठ तथा धरान उपमहानगरपालिकाबाट सुजन श्रेष्ठ र प्रनिष ठकुरी मैदानमा उत्रिएका थिए । प्रतियोगिताका विजयी टोलीलाई कार्यक्रमका प्रमुख अतिथि जिल्ला समन्वय समिति खोटाङका प्रमुख बबि चाम्लिङ, नगरप्रमुख दिपनारायण रिजाल, उपप्रमुख विणादेवी राई, प्रमुख प्रशासकीय अधिकृत शान्तिराज प्रसाइँ, सत्ता रुढ दल नेपाल कम्युनिष्ट पार्टी (नेकपा)का सचिव रामप्रसाद दंगाल लगायतले पुरस्कार प्रदान गर्नुभएको थियो ।

प्रदेश नम्बर १ भित्रका नगरपालिकालाई मात्र सहभागी गराइएको प्रतियोगितामा खोटाङ, उदयपुर, ओखलढुङ्गा, सोलुखुम्बु, भोजपुर, धनकुटा, सङ्खुवासभा, सुनसरी, मोरङ लगायत दश जिल्लामा पर्ने विभिन्न नगरपालिकाका ३४ टोलीको सहभागिता थियो । प्रदेश नम्बर १ भित्र पर्ने १४ जिल्लाका ५४ वटै नगरपालिकालाई निमन्त्रणा गरिएपनि झापा, ईलाम, पाँचथर र ताप्लेजुङको सहभागिता नरहेको आयोजकले जनाएको छ ।

करीब नौँ वर्ष लगाएर निर्माण सम्पन्न गरिएको खोटाङ बहुउद्देश्यीय कवर्डहलमा पहिलो पटक आयोजना गरिएको नगरपालिकास्तरीय ब्याडमिन्टर प्रतियोगिता मङ्गलबार नगरप्रमुख रिजाल र उपप्रमुख राईले पानसमा बत्ती बालेर उद्घाटन गर्नुभएको थियो । नगरपालिकाभित्र पर्ने धार्मिक तथा पर्यटकीयस्थलको प्रचार–प्रसार गर्दै पर्यटन प्रवद्र्धनमा सघाउ पु¥याउने उद्देश्यले उक्त नगरपालिकाले जिल्ला ब्याडमिन्टन सङ्घ खोटाङसँगको सहकार्यमा नकआउट ब्याडमिन्टन प्रतियोगिता आयोजना गरेको हो ।

जिल्लामा पहिलो पटक आयोजना गरिएको मेयर कप प्रतियोगिता समापन कार्यक्रममा १३ औँ दक्षिण यसियाली खेलकुद प्रतियोगिता (साग) अन्तरगत ब्याडमिन्टर प्रतियोगितामा कास्य पदक विजेता जीवन आचार्यलाई नगद सहित सम्मान गरिएको छ । दिक्तेल रुपाकोट मझुवागढी नगरपालिका–२ दिक्तेलका आचार्यलाई नगद रु २० हजारको साथमा प्रमाणपत्र सहित सम्मान गरिएको हो ।

उद्घाटन तथा समापन कार्यक्रममा विनिन्न जातजातिको साँस्कृतिक झाँकी एवम् नृत्य समेत प्रस्तुत गरिएको थियो । जिल्लामा पहिलो पटक आयोजना गरिएको प्रदेश नम्बर–१ अन्तरगत नगरपालिकास्तरीय मेयर कप खुला ब्याडमिन्टन प्रतियोगिता सफलता पूर्वक सम्पन्न भएको जनाइएको छ ।