यस वर्ष २९ वटा भवन वनाउदै नगरपालिका

दिवश रिजाल
खोटाङ, ४ पुस । दिक्तेल रुपाकोट मझुवागढी नगरपािलकाले आर्थिक वर्ष ०७६÷०७७ मा नगरपालिका भित्र २९ वटा भवन निर्माण गर्ने भएको छ । जसमध्ये १५ वटा विद्यालय भवन, ११ वटा वडा कार्यालय र ३ वटा स्वास्थ्य चौकीको कार्यलय यसै आर्थीक बर्ष भित्र निर्माण हुने छन् ।
नगरपालिका भित्र रहेका कतिपय विद्यालयको अवस्था नाजुक रहेको र भौतिक पूर्वाधारका हिसाबले समेत कमजोर रहेकाले यस आर्थिक वर्षभित्रमा निर्माण गर्ने लक्ष्य रहेको नगरप्रमुख दिपनारायण रिजालले आज मिट द प्रेस कार्यक्रममा जानकारी दिएका छन् । अहिले कतिपय वडा कार्यालय भाडामा बसेको र कतिपय बनाईका भएपनि पुरानो र जिर्ण रहेकाले तत्काल भवन निर्माणको काम अगाडि बढाउने उनको भनाई रहेको थियो । यस्तै ३ वटा वडामा स्वास्थ्य संस्थाको भवन पनि यसै आर्थिक वर्ष भित्र सकिने जानकारी दिइएको छ ।
यस्तै नगरपालिकाले अर्गानिक नगर बनाउने अभियान अन्र्तगत प्राङगारिक मलले २ महिना भित्र उत्पादन थाल्ने बताइएको छ । लगभग आयोजनाको काम अन्तिम चरणमा पुगेको साथै नगरपालिकालाई पुर्ण विषाधीमुक्त नगर बनाउन कुनै किसिमका रासायनिक विषाधीलाई बन्देज गर्ने र रासायानिक मललाई न्युनिकरण गर्दै लैजाने कार्यक्रममा बताईएको छ ।
कार्यक्रममा नेपाल भ्रमण वर्ष २०२० लाई पूर्णरुपमा सफल बनाउन तत्पर रहेको बताउँदै सन २०२०को शुरुवातका दिन १ जनवरीका दिन दिक्तेल बजारको जिरो प्वाईन्ट किरात चोकमा रहेको प्रवेशद्धारा उद्घाटन गरेर व्यापक प्रचार प्रसारको काम शुरुवात गर्ने बताईएको छ । यस्तै पर्यटन प्रर्वद्धन गर्न खोटाङ उद्योग वाणिज्य संघको सहकार्यमा ऐतिहासिक प्रथम खोटाङ महोत्सवको आयोजना गर्न लागिएको हो ।
कार्यक्रममा जिल्ला सदरमुकामको बजार क्षेत्रभित्र तत्काल बाटो ढलानको काम शुरु गरिने भएको छ । बजार क्षेत्रमा करिब १६ करोडको लगानीमा सडक क्षेत्र ढलान हुने ‘मिट द प्रेस’मा जानकारी दिइएको छ । यस्तै यहि नगरपालिका भित्र प्रदेश तथा संघीय सभा सदस्यहरु मार्फत निर्वाचन क्षेत्र पूर्वधार विकास साझेदारी कार्यक्रम अन्र्तगतको ३३ वटा योजना परेको पनि कार्यक्रममा जानकारी गराईएको छ । जसमध्ये ४ वटा योजनाको टेण्डर प्रक्रियाबाट लैजानु पर्ने बताइएको छ ।
‘मिट द प्रेस’ कार्यक्रममा गएको महिना भित्र गरिएका कामहरुको उपलब्धीहरुको बारेमा जानकारी गराईएको थियो । नगरले गएको महिना भित्र अपाङताको परिचय पत्र वितरण गरेको , उपभोक्ता समितिका पदाधिकारीहरुलाई योजना संचालनको प्रकृया बारेमा प्रशिक्षण दिइएको बताइएको छ । सबैको साथ र सहयोगले भर्खर निर्माण कार्यसकिएको खोटाङ बहुद्देशिय कवर्ड हलमा नगरले संचालन गरेको १ नम्बर प्रदेश स्तरीय प्रथम मेयर कप व्याडमिन्टन प्रतियोगीता सफलता पूर्वक सम्पन्न भएको जनाईएको छ । साथै प्रतियोगितामा सबै तह र तप्काले गरेको सहयोग प्रति नगरको तर्फबाट आभार समेत प्रकट गरिएको छ ।