बाक्सिला गोल्डकप फागुन २२ बाट शुरु हुँदै

दिवस रिजाल
खोटाङ, फागुन १८–
खोटाङमा सर्वाधिक राशीका रुपमा रहेको बाक्सिला गोल्डकपको एघारौं संस्करण आगामी फागुन २२ गतेदेखि शुरु हुने भएको छ । फुटबलको व्यवसायीक बिकासको लक्ष्य लिएर २०६२ सालमा स्थापित बाक्सिला फुटबल क्लवको आयोजनामा २०६१ सालदेखि सञ्चालन हुदैआएको बाक्सिला गोल्डकपको एघारौं संस्करण फागुन २२ गतेदेखि २६ गतेसम्म सञ्चालन हुने भएको हो । बाक्सिला फुटबल क्लवले दिक्तेलमा पत्रकार सम्मेलन गरेर ‘११ औं केपीलासगढी बाक्सिला रनिङ गोल्डकप’को खेल तालिका सार्वजनिक गरेको छ ।
केपीलासगढी गाउँपालिका–४ बाक्सिला खेलमैदानमा सञ्चालन हुने गोल्डकपका विजेताले २ लाख भन्दा वढिको उपाधि जित्ने छ । यसै गरि उपविजेताले करिव एक लाख रुपैयाँ र सेमिफाईनलिस्टले २० हजार ११ रुपैयाँ पाउने बाक्सिला फुटबल क्लवले गरेको पत्रकार सम्मेलनमा वताईएको छ । यस्तै, प्रतियोगीताका बेष्ट प्लेयर र सर्वाधिक गोलकर्तालाई जनही ११ हजार १११, बेष्ट गोलकिपर, बेष्ट डिफेण्डर, बेष्ट मिडफिल्डर र बेष्ट कोचलाई जनही ५ हजार ११रुपैयाँ प्रदान गरिने क्लवका अध्यक्ष शिवकुमार राईले वताउनु भयो । प्रतियोगीतामा खारम्बु स्पोर्टस क्लव, बाक्सिला फुटबल क्लव, सोल्मा स्पोर्टस क्लव, नेर्पा स्पोर्टस क्लव, हलेसी तुवाचुङ स्पोर्टस क्लव, जन्तेढुंगा स्पोर्टस क्लव, खोटाङ भगवती स्पोर्टस क्लव र हलेसी खेलकुद विकास समितिका बीचमा प्रतिष्पर्धा हुने भएको छ ।
गोल्डकपका लागि केपीलासगढी गाउँपालिकाले ५ लाख आर्थिक सहयोग गर्ने भएपछि क्लवले प्रतियोगीताको नाम ‘११औं केपीलासगढी बाक्सिला रनिङ गोल्डकप’ राख्ने निर्णय गरेको जानकारी दिएको छ । १० औं संस्करणकाक्रममा निर्णायकमाथि हातपात गरेकामा बुईपा खेलकुद समुह ११ र सो क्लवबाट खेल्ने खेलाडीलाई ११औं संस्करणमा सहभागी हुन प्रतिबन्ध गरिएको वताईएको छ ।