कटारीमा भएको मेयरकप करातेमा दिक्तेल रुपाकोट मझुवागढी नगरपालिका लाई प्रथम स्थान

दिवस रिजाल,
फागुन १८ खोटाङ
उदयपुरको कटारी नगरपालिका द्धारा आयोजित दोश्रो मेयरकप सितोरियो कराते प्रतियोगीतामा खोटाङको दिक्तेल रुपाकोट मझुवागढी नगरपालिकाले प्रथम स्थान ओगट्न सफल भएको छ । शुक्रबारबाट शनिबारसम्म भएको उक्त प्रथियोगीतामा ६ स्वर्ण, २ रजत र ३ कास्य जित्दै दिक्तेल रुपाकोट मझुवागढी नगरपालिका प्रथम भएको हो ।
दिक्तेल रुपाकोट मझुवागढी नगरपालिकालाई पछ्याउँदै ३ कास्य, २ रजत र ४ कास्य सहित धरान उपमहानगरपालिका दोश्रो स्थान ओगट्न सफल भएको थियो । यसैगरी २ स्वर्ण ३ रजत र ४ कास्य सहित धनकुटा नगरपालिका तेश्रो भएको आयोजक कटारी नगरपालिकाले जानकारी दिएको छ । प्रथम स्थान प्राप्त टिमले नगद १० हजार, दोश्रो र तेश्रो स्थान प्राप्त टिमले नगद ५ हजारका साथमा ट्रफी र प्रमाणपत्र प्राप्त गरेका छन् ।
प्रतियोगीतामा दिक्तेल रुपाकोट मझुवागढी नगरपालिकालाई स्वर्ण पदक जिताउनेहरुमा रोश्मा राईले ५५ केजी कुमाते, ४५ केजी युमासाम राई, ५५ केजी समुहमा रोश्मा राई, ६० केजी तौल समुहमा मिसडोना राई, ६५ केजी तौल समुहमा रुरीहाङ रहेका छन् ।
उत्कृष्ट महिला खेलाडी रक महिला एकलकातामा रोश्मा राई र पुरुष एकलकातामा रुरीहाङ दुमीले स्वर्ण पदक जितेको नेपाल सितोरियो कराते संघका अध्यक्ष संजयकुमार राईले जानकारी दिए ।
यस्तै, ४५ केजी समुहमा सुर्यचन्द्र राई र ६० केजी समुहमा अर्जुन श्रेष्ठले रजत जितेका छन् । ३५ केजी समुहमा निलम श्रेष्ठ, ४० केजी समुहमा प्रतिमा राई र ५० केजी समुहमा प्रकाश परियारले कास्य पदक जिताएको कराते संघ खोटाङले जनाएको छ ।