खोटाङमा एउटा कामको लागि लिएको गाडी पास अर्कै प्रयोजनमा प्रयोग ।

२० चैत्र २०७६ खोटाङ, । कोरोना भाइरसको संक्रमण फैलन नदिन सरकारले लकडाउन घोषणा गरेसँगै जिल्ला प्रशासन कार्यालय खोटाङबाट अत्यावश्यक सामान ढुवानीका लागि भनेर अनुमति लिएका ट्रिफर, ट्रक र ट्याक्टरमा यात्रु तथा निर्माण सामग्री ओसारपसार गरेको जानकारी प्राप्त भएको छ ।

जिल्लामा सञ्चालित अधिकांश विकास÷निर्माणका योजनामा बाहिरी जिल्लाका कामदार ल्याउने गरिएको छ । कामदारहरुलाई घर पठाउन निर्माण व्यवसायीले ट्रिफर, ट्रक र ट्याक्टरकै प्रयोग गरेको पाइएको छ ।

निर्माण व्यवसायीले ना ६ प ६०५३ नम्बरको ट्याक्टरमार्फत १५ जना कामदारलाई घर पठाएको जानकारी आएको छ । यात्रुबाहक सवारी नपाएको भन्दै निवेदनसहित अनुरोध गर्न आएपछि मानवीय हिसाबले एउटा ट्याक्टरलाई मात्र यात्रु बोक्ने प्रयोजनका लागि अनुमति दिइएको सहायक प्रमुख जिल्ला अधिकारी श्यामकुमार राईले बताएकाछन् ।

सरकारले लकडाउन घोषणा गरेलगत्तै चैत–७ गतेदेखि हालसम्म प्रशासन कार्यालयबाट साना तथा ठूलागरि १२१ वटा सवारी धनीले अनुमति लिएका छन् । प्रशासनबाट सवारी अनुमति लिनेमा अधिकांश मोटरसाइकल चाकल रहेका छन् ।

मोटरसाइकलको अनुमति लिएका सरकारी कर्मचारीले समेत आफ्नो व्यक्तिगत काममा प्रयोग गर्ने गरेको स्रोतले जनाएको छ । स्रोतका अनुसार बिना चालक अनुमतिपत्रका कतिपय सरकारी कर्मचारीले जिल्ला प्रशासन कार्यालयबाटै सवारी अनुमति लिएर मोटरसाइकल चलाइरहेको पाइएको हो ।

यतिसम्म कि, बिरामी बोकेर राजधानी काठमाडौँ तथा तराईका जिल्ला जाने जीपले फर्कँदा चर्को शुल्क लिने गरेको पाइएको छ । काठमाडौँबाट खोटाङ आउने जीपले प्रतिव्यक्ति रु पाँच हजारका दर भाडा लिएको नाम नभन्ने सर्तमा एक यात्रुले बताएका छन् ।

प्रमुख जिल्ला अधिकारी शालिग्राम शर्मा पौडेलका अनुसार आफूलाई समेत गुनासो आएको छ । “प्रशासनबाट अनुमति दिइएको सवारी साधन कुन प्रयोजनमा प्रयोग भइरहेको छ भन्ने अनुसन्धान शुरु गरेका छौँ”, “तोकिएको कामभन्दा फरक प्रयोजनमा प्रयोग गरिएकालाई कडा कारवाही हुन्छ ।”