कोरोनाले (युके) मा खोटाङ्गेको मृत्यु, १२ जना संक्रमित ।

१२ वैशाख २०७७–खोटाङ । कोरोना भाइरस (कोभिड–१९)को सङ्क्रमणबाट बेलायत मा बस्दै आएकी खोटाङको ऐसेलुखर्क गाउँपालिका–१ राखाबाङ्देल स्थाई घर भएकी ३२ वर्षीय बिमा नाछिरिङ राईको मृत्यु भएको जानकारी प्राप्त भएको छ ।
मिर्गौला सम्बन्धी समस्याबाट पीडित बिमालाई कोरोनाको सङ्क्रमण भएको पुष्टि भएपछि बेलायतस्थित जर्ज इलियट अस्पतालमा भर्ना गरेर उपचार गर्नेक्रममा मृत्यु भएको समाजसेवी एवम् ब्रिटिस गोर्खा भेट्रान एसोसिएसनका महासचिव भीम सारुले बताएकाहुन् ।
बेलायतस्थित नटिङ्घम बस्दै आएकी बिमाको कोरोना भाइरसको सङ्क्रमणबाट मृत्युको विषयमा किरात रदु नाछिरिङ साखाम केन्द्र, केन्द्रीय समिति नेपालले आफ्नो फेसबुक पेजमार्फत दुःख व्यक्त गरेको छ ।
यसैबीच, बेलायतमा बस्दै आएका १२ जना खोटाङ्गेलाई कोरोना सङ्क्रमण भएको खोटाङ सेवा समाज युकेले जनाएको छ । समाजले अप्रिल २१ मा जारी गरेको अपिलमा फल्कस्टोनमा एक, बेजिङस्टकमा छ, आशफोर्डमा तीन तथा क्याट्रिक र ओकिङमा एक÷एक जना खोटाङ्गे सङ्क्रमित भएको उल्लेख छ ।
उनीहरुको अहिले बेलायतस्थित विभिन्न अस्पतालमा उपचार भइरहेको जनाइएको छ । बेलायतमा उपचाररत सङ्क्रमित सबैको अवस्था अहिलेसम्म सामान्य रहेको खोटाङ सेवा समाज युकेले जनाएको छ ।