गाउपालिका भित्रका ४६ जना सुत्केरीहरुलाई घरमै पुगेर पोषणयूक्त खाद्य सामग्री वितरण ।

३० बैशाख २०७७–खोटाङ । जिल्लाको दिप्रुङ चुइचुम्मा गाउँपालिकाले कोरोना भाइरस (कोभिड–१९) को संक्रमण रोकथाम तथा नियन्त्रणका लागि गरिएको लकडाउनको अवधिमा पालिकाभित्रका सुत्केरी ४६ जना आमाहरुको लागि पोषणयूक्त खाद्य सामग्री वितरण गरेको जानकारी प्राप्त भएको छ ।

लकडाउनका कारण कुनैपनि आमा र बच्चा कुपोषित एबं रक्त अल्पता भएर बाँच्न नपारोस भनेर गाउँपालिकाले चैत्र र बैशाख महिनामा सुत्केरी भएकाहरुको लागि पोषणयुक्त खाद्य सामग्री वितरण गरिएको पालिकाकी उपाध्यक्ष सपना राईले जानकारी दिएकीछन् ।

राईका अनुसार प्रतिव्यक्ति चना २ केजी, गहुँ २ केजी, भटमास १ केजी, अण्डा ४ वटा र लुगाधुने र नुहाउने सावुन एक÷एक वटा वितरण गरिएको हो ।

गाउँपालिकाको कोरोना भाइरस (कोभिड (१९) नियन्त्रण तथा रोकथाम स्थानीय कार्यदलको गत शुक्रबार बसेको बैठकले चैत्र र बैशाख महिनामा सुत्केरी भएका आमाहरुको लागि पोषणयूक्त खाद्य सामग्री उपलव्ध गराउने निर्णय गरेको हुनाले घरमै पुगेर पोषणयुक्त खाद्य सामग्री बितरण गरिएको गाउँपालिका अध्यक्ष भूपेन्द्र राईले जानकारी दिएकाछन् ।