आरडिटी पोजिटिभ देखिएका ८ जनाकै पिसिआर रिपोर्ट नेगेटिभ ।

२१ जेठ २०७७–खोटाङ । जिल्लाको ऐसेलुखर्कमा आरडिटी पोजिटिभ देखिएको भनिएका ८ जनाकै पिसिआर रिपोर्ट भने नेगेटिभ आएको जानकारी प्राप्त भएको छ ।

आरडिटी परीक्षणका क्रममा पोजिटिभ रिपोर्ट देखिएका आठ जना र शंकास्पद व्यक्तिसहित १९ जनाको स्वाब संकलन गरेर पिसिआर टेष्टमा पठाइएकाहरुको सबैको पिसिआर रिपोर्ट नेगेटिभ आएको गाउँपालिकाका अध्यक्ष बिश्वनाथ निरौलाले जानकारी दिएकाछन् ।

पहिलो दिन दुई जना र दोश्रो दिन पाँच जनाको आरडिटी रिपोर्ट पोजेटिभ देखिएपछि उनीहरुसहित शंकास्पद १९ जनाकोे स्वाब संकलन गरेर पिसिआर परीक्षणका लागि गत सोमबार राष्ट्रिय जनस्वास्थ्य प्रयोगशाला टेकु काठमाडौं पठाइएको थियो ।

पिसिआर रिपोर्ट नेगेटिभ देखिएसँगै गाउँपालिकामा फैलिएको त्रास सामान्य बन्दै गएको छ । आरडिटी पोजिटिभ देखिएसँगै सिल गरिएको गाउँपालिका पिसिआरको नेगेटिभ रिपोर्ट आएपछी खुला गरिएको र गाउँपालिकाबाट प्रवाह हुने सबै सेवाहरु सुचारु गराइएको अध्यक्ष निरौलाको भनाई रहेको छ ।