स्थानीयले राखे वडाध्यक्ष पुरीलाई क्वारेन्टाइनमा ।

२२ जेठ २०७७–खोटाङ । जिल्लाको हलेसी तुवाचुङ नगरपालिका–१० अर्खौलेका वडाध्यक्ष ज्ञानबहादुर पुरीलाई स्थानियले नै क्वारेन्टाइनमा राखेको जानकारी आएको छ ।

वडाध्यक्ष पुरी गएराति मादक पदार्थ सेवन गरेर क्वारेन्टिनमा बसेकाहरुसँग सम्पर्कमा गएको फेला पारेपछि स्थानीयले (बुधबार) दिउसोबाट क्वारेन्टिनमा राखेको स्थानियको भनाई रहेको छ ।

गत मङ्गलबार दिउसैदेखि मादक पदार्थ सेवन गरेका वडाध्यक्ष पुरीले झापाबाट आएर वडा कार्यालयले बनाएको क्वारेन्टिनमा बसेका एक युवकको मोबाइलसमेत खोसेको स्थानीय बासिन्दाको आरोप रहेको छ ।

मादक पदार्थ सेवन गरेका वडाध्यक्ष पुरीले मातेको झोँकमा मंगलबार राति क्वारेन्टाइनमा बसेकाहरुलाई हप्काउनुका साथै एक युवकको मोबाइलसमेत खोसेर लगेको र क्वारेन्टिनमा बसेकाहरुसँगको सम्पर्कमा गएका वडाध्यक्ष पुरीबाट कोरोना भाइरसको सङ्क्रमण सर्ने खतरा भएकाले जनालाई क्वारेन्टाइनमा राख्न परेको स्थानियको भनाई रहेको छ ।

वडाध्यक्ष पुरीले मंगलबार राति क्वारेन्टिनमा खटिने स्वास्थ्यकर्मी तथा कर्मचारीलाई समेत हप्कीधप्की गरेको प्रत्यक्षदर्शीले बताएका छन् । अधिकांश समय मादक पदार्थ सेवन गरेर बस्ने वडाध्यक्ष पुरीले कार्यालयमा खटिएका कर्मचारीलाई आफ्नै घरमा आएर हाजिर गर्न लगाउने गरेको एक कर्मचारीको भनाई रहेको छ ।

वडाध्यक्ष पुरीलाई (बुधबार)बाट १४ दिनसम्म क्वारेन्टिनमा राखिएको नगरप्रमुख इवन राईले बताएकाछन् । हामीले बनाएको नियम सबैलाई लागू हुन्छ , वडाध्यक्ष पुरीले नियम उलङ्घन गरेकाले उनलाई नगरपालिकाकै तर्फबाट १४ दिनसम्म क्वारेन्टिनमा राखिएको नगर प्रमुख राईको भनाई रहेको छ ।