बर्षा कम भएसंगै सलहको चलखेल ।

८ श्रावण २०७७–काठमाण्डौ । वर्षा कम भएसँगै मङ्गलबार साँझ गुल्मी र स्याङ्जाको आकाशमा सलहको झुण्ड देखिएको जानकारी प्राप्त भएको छ ।

मङ्गलबार साँझ स्याङ्जाको आकाश भएर सलहको झुण्ड तनहुँतिर लागेको प्लान्ट क्वारेन्टिन तथा विषादी व्यवस्थापन केन्द्रका प्रमुख शहदेव हुमागाईंले जानकारी दिएकाछन् ।

पानी पर्दा सलहहरू ठूला रुखका हाँगामुनि र पातमुनि बस्ने भएकाले हराएजस्तो देखिएका हुन् पानी पर्न छाडेपछी पुनःसक्रिय हुने भएकाले कृषकलाई सचेत रहन समेत भनिएको छ । चार दिनदेखि निस्क्रिय रहेका सलह एक्कासि देखिएपछि कृषि ज्ञान केन्द्र स्याङ्जाले त्यहाँ वरपरका स्थानीयलाई सचेत रहन भनेको हो । कुनै घना जङ्गलमै सलह बसेको हुन सक्ने र वर्षा कम भएसँगै त्यो पुन सक्रिय भएर लाग्ने भएकोले कहां बसेको छ सो को खोजी भइरहेको कृषि ज्ञान केन्द्रको भनाई रहेको छ ।

मङ्गलबार साँझ देखिएको सलहको झुण्ड ८ देखि १० लाखसम्मको भएको अनुमान गरिएको प्लान्ट क्वारेन्टिन तथा विषादी व्यवस्थापन केन्द्र तनहुँका प्रमुख शहदेव हुमागाईंको भनाई रहेको छ । हुमागाँईका अनुसार भारतमा रहेका सलह त्यहाका किसानहरूले लखेटेपछि नेपालमा आउने र नेपालका किसानहरूले लखेटेपछि भारत जाने क्रम निरन्तर चलिरहेको छ ।

शुक्रबारसम्म हावाको बहाव नेपालतर्फ रहेकाले सलहको जोखिम रहेपनि शुक्रबारबाट हावाको बहाव राजस्थानतर्फ फर्कने भएकाले नेपालमा सलहको जोखिम शुक्रबारसम्म कायमै हुने हुमागाईंले बताए ।

यतिबेला भारतको दिल्ली, उत्तर प्रदेश र बिहारमा सलहका झुण्ड सक्रिय रहेकाले अब हावाको बहाव नेपालतिर आएको र शुक्रबारबाट पुनः त्यतै जाने भएकाले तीन दिन जोगिएमा यो पटकको सलहको जोखिम टर्नेछ । सलह धपाउने बिश्वब्यापी मान्यता भनेकै थाल ठटाउने,धुवा लगाउने भएकाले कृषकलाई बाँकी समय सचेत रहन अनुरोध समेत गरिएको छ ।