पहिरोले घर पुर्दा एकै परिवारका ६ को मृत्यु ।

३० श्रावण २०७७ काठमाण्डौ । लगातारको झरीका कारण कालिकोटको महावै गाउँपालिका–३ नकुमा पहिरोले घर पुर्दा एकै परिवारका ६ जनाको मृत्यु भएको खबर प्राप्त भएको छ ।

बिहीबार राति साढे १२ बजे वडा सदस्य रजबहादुर विष्टको घर पहिरोले पुर्दा रजबहादुरका छोरा १३ वर्षीय पुष्प विष्ट, ११ वर्षीय प्रविण विष्ट, १८ वर्षीय सविना विष्ट र १५ वर्षीय आशा विष्टको मृत्यु भएको छ। सोही घरमा सुतिरहेका रजबहादुरका दाजु डिलबहादुरका १९ वर्षीया छोरी शान्ति विष्ट र १० वर्षीया छोरी रेशा विष्टको मृत्यु भएको घटनास्थलमा पुगेका कर्णाली प्रदेशका मुख्यमन्त्री महेन्द्रबहादुर शाहीका स्वकीय सचिव खेमबहादुर सिंहले जनाएकाछन् ।