पत्रकारहरुलाई कोभिड १९ को जोखिम सामना गर्न सरकार संग ९ सुत्रिय माग ।

३२ श्रावण २०७७–सुनसरी । पत्रकारहरुलाई कोभिड १९ को जोखिम सामना गर्न ९ सुत्रिय माग राख्दै नेपाल प्रेस युनियन प्रदेश नं. १ ले प्रेस बिज्ञप्ती जारी गरेको जनाएको छ ।

युनियनले जोखिम क्षेत्रमा रहेका पत्रकारहरुको कोभिड–१९ परीक्षण दर बढाउन, संक्रमणमा परेका पत्रकारहरुको उपचारमा ध्यान दिन तथा प्रदेश राजधानी विराटनगर र जिल्लामा पत्रकारहरुमा संक्रमण पुष्टि हुनासाथ आईसोलेसन सेन्टर तथा अस्पतालमा भर्ना गर्ने व्यवस्था गर्नु पर्ने माग राखेको छ ।

कोभिड–१९ का कारण आर्थिक संकटको सामाना गरिरहेका पत्रकारहरुलाई सरकारी तथा गैरसरकारी निकायको सहकार्यमा नेपाल पत्रकार महासंघको जिल्ला, प्रदेश र केन्द्रबाट लेखनवृत्ति कार्यक्रम सञ्चालन तथा यसलाई पारदर्शी अनि सहभागितामुलक बनाउन, सरकारद्वारा विषम परिस्थितिमा सञ्चारकर्मी र सञ्चार गृहका लागि विशेष राहत प्याकेज तत्काल घोषणा गर्न भनेको छ ।

कोरोना भाइरस संक्रमणका कारण बन्द भएका र सञ्चालनमै समस्या भइरहेका अनलाईन, रेडियो र टेलिभिजन जस्ता सञ्चार गृहका निम्ति सरकारले सस्तो ब्याजदरको ऋणको ब्यबस्था तथा अन्य लोक कल्यणकारी योजनाको व्यवस्थापन आदि गर्न माग गरेको बिज्ञप्तीमा उल्लेख गरेको छ ।

२०७७ साल को महासंघको सदस्यतामा नवीकरणमा लाग्ने सम्पूर्ण शुल्क छुट गर्नुपर्ने र महासंघले आफ्ना सदस्यका लागि कोरोना बीमाको प्रबन्ध गर्नुपर्ने, कार्यरत पत्रकारहरुलाई राष्ट्रिय मिडियाहरुले लामो समयदेखि पारिश्रमिक नदिएकोले तत्काल पारिश्रमिक उपलब्ध गराउन पनि महासंघ र युनियनका केन्द्रीय समितिले पहल गर्नुपर्ने लगाएतका माग अघि सारेको छ ।