उपत्यकामा निषेधाज्ञा आज राती १२ बजे सकिने,निरन्तरता दिने या नदिने आज निर्णय हुने ।

१० भाद्र २०७७–भक्तपुर । कोरोना महामारी नियन्त्रण तथा रोकथामका लागि उपत्यकाका ३ शहरमा थप १ हप्ता निषेधाज्ञा जारी राख्ने तयारी भएको जानकारी प्राप्त भएको छ ।

काठमाडौं, ललितपुर र भक्तपुरका प्रमुख जिल्ला अधिकारीबीच मंगलवार भएको छलफलमा निषेधाज्ञा १ हप्ता लम्ब्याउनेबारे छलफल भएपनि निर्णय भईनसकेकोले बुधबारमात्र निर्णय हुने काठमाडौं जिल्ला प्रशासन कार्यालयका प्रवक्ता एवं सहायक प्रमुख जिल्ला अधिकारी तुल्सीराम पौडेलले बताएकाछन् ।

उपत्यकास्थित नगरका प्रमुखहरू, जिल्ला कोभिड–१९ संकट व्यवस्थापन केन्द्र र सुरक्षा अधिकारी सम्मिलित बैठकले यसअघि नै काठमाडौं, भक्तपुर र ललितपुरमा थप १ हप्ता निषेधाज्ञा जारी राख्न सिफारिस गरेको थियो ।

कोरोना संक्रमण महामारी नियन्त्रण तथा रोकथामका लागि उपत्यकाको ३ जिल्लामा भदौ ३ गते बुधवार राति १२ बजेबाट जारी निषेधाज्ञा १० गते बुधवार मध्यरातबाट सकिँदैछ ।

निषेधाज्ञाको समयमा महानगरीय प्रहरी कार्यालयले तोकिएको अवधिभन्दा बढी समय पसल खोल्नेदेखि आफूखुशी सवारी चलाउने १ हजारभन्दा बढीलाई कारबाही गरिएको जनाएको छ ।