देश पोष्ट
१७ भाद्र २०७७–काठमाण्डौ । कोराना भाइरस कोभिड १९ को न्युनिकरण तथा ब्यबस्थापनको लागि गत २०७६ चैत्र ४ गते देखी बन्द भएको नियमित अन्तर्राष्ट्रिय उडान गत राती १ः०० बजेबाट शुरू भएको जानकारी प्राप्त भएको छ ।
नेपाल वायु सेवा निगमको वाइडबडी जहाज जापानको नारिता उडेसँगै रोकिएको नियमित उडान शुरू भएको नागरिक उड्डयन प्राधिकरणले जनाएको छ ।
सरकारले भदौ १६ देखि सीमित संख्यामा नियमित अन्तर्राष्ट्रिय उडान सञ्चालन गर्ने निर्णय गरेसँगै संस्कृति पर्यटन तथा नागरिक उड्डयन मन्त्रालयले गत हप्ता मात्रै नियमित अन्तर्राष्ट्रिय उडानको तालिका सार्वजनिक गरेको थियो । मन्त्रालयले तत्काल सेप्टेम्बर सम्मका लागि ५८ वटा नियमित उडानको तालिका बनाएको छ ।
सार्वजनिक गरिएको तालिकाअनुसार हरेक दिन २ वटा नियमित अन्तर्राष्ट्रिय उडान हुनेछन् । जसमध्ये २९ उडान स्वदेशी अन्तर्राष्ट्रिय उडान सेवा प्रदायक निगम र हिमालय एयरलाइन्सको हुनेछ । बाँकी विभिन्न देशका अन्तर्राष्ट्रिय सेवा प्रदायकको हुने गरी तालिका सार्वजनिक गरिएको छ ।
मन्त्रिपरिषद्को सोमवार बसेको बैठकले यसअघि दैनिक ५०० भन्दा बढी यात्रु ल्याउन नपाउने सीमालाई बढाएर ८०० सम्म यात्रु ल्याउने निर्णय गरेको छ । यसै समयमा भइरहेको उद्धार उडानसमेत जोडेर सो संख्यामा यात्रु ल्याउन सक्ने सरकारको निर्णय छ । मन्त्रालयले नियमित अन्तर्राष्ट्रिय उडानसँगै सार्वजनिक गरेको तालिकाअनुसार सेप्टेम्बरभर २७ वटा उद्धार उडान हुनेछन् ।
नियमित अन्तर्राष्ट्रिय उडानका लागि सरकारले केही विशेष नियम पनि बनाएको छ । यस्तो उडानका लागि यात्रुले ७२ घन्टाअघिको कोभिड नेगेटिभ रिपोर्ट अनिवार्य बुझाउनुपर्ने छ । यसरी परीक्षण नगरेका यात्रुसमेत मिसाएर उडान गराएमा त्यसको क्वारेन्टाइन व्यवस्थापन खर्च सम्बन्धित विमान कम्पनीले नै व्यहोर्नुपर्ने छ ।
नेपाल नागरिक उड्डयन प्राधिकरणले नियमित किसिमको अन्तर्राष्ट्रिय उडानका लागि सबै तयारी पूरा भइसकेको जनाएको छ ।
खासगरी कोभिड संक्रमणबाट बच्ने उपायसहित विमानस्थलका हरेक प्रक्रियाका लागि आवश्यकता अनुसार जनशक्ति व्यवस्थापन गरिएको प्राधिकरणका प्रवक्ता राजकुमार क्षेत्रीले जानकारी दिए ।
विमानस्थल सुधारतर्फ बन्दाबन्दीकै अवस्थामा त्रिभुवन अन्तर्राष्ट्रिय विमानस्थलको धावन मार्ग र ट्याक्सी वे ३०० मिटर विस्तार गरिएको छ । यात्रु आगमनलाई सोझै विमानस्थल प्रवेशद्वार नजिकैको ट्याक्सी पार्किङ स्थलतर्फ लैजाने व्यवस्था गरिएको छ । सामाजिक दूरी कायम गर्ने तथा विमानस्थलको साजसज्जा पनि यसैबीचमा सम्पन्न भएको छ ।
नियमिततर्फको अन्तर्राष्ट्रिय उडान शुरू भएपनि आन्तरिक उडान भने खुला भएको छैन । सोमवारको मन्त्रिपरिषद् बैठकले भदौ मसान्तसम्म आन्तरिक उडान खुला नगर्ने निर्णय गरिसकेको छ ।
सरकारले नियमित तथा चार्टर्ड अन्तर्राष्ट्रिय उडानबाट नेपाल आउन पाउनेको संख्या बढाएको छ । भदौ १७ गतेदेखि खुल्ने उडानबाट दैनिक ८०० जना स्वदेश आउन पाउने छन् । यसअघि सरकारले दैनिक ५०० मात्र आउन दिने निर्णय गरेको थियो । गोरखापत्र दैनिकमा खबर छ ।
सूचना विभाग दर्ता नं. – १५०३/०७६/०७७
प्रवन्धक/सम्पादक : लोकमणि रिजाल
सह-सम्पादक :अस्मिता खत्री
सह-सम्पादक : तेन्जु योन्जन (मलेसिया)
कानूनी सल्लाहकार : ओम प्रकाश घिमिरे
दिक्तेल, रुपाकोट मझुवागढी-१४ खोटाङ्ग, प्रदेश नं. १
मोबाईल नं ९८४२९०६६४२
Email: [email protected]