जघन्य अपराधमा कठोर सजायको माग

देशपाेष्ट/काठमाण्डाै । अन्तरधार्मिक राष्ट्रिय सञ्जाल नेपालले बलात्कारजस्ता जघन्य अपराध गर्नेलाई कठोर सजायको व्यवस्था गर्न सरकारसँग अपिल गरेको छ। धर्मका नाममा समेत  बालविवाह, छाउपडी, बलिप्रथा, बोक्सीप्रथा, जातीय विभेदजस्ता  प्रचलन रहेकाले त्यस्ता परम्पराविरुद्ध आफ्नो धार्मिक समूहमा सचेतना फैलाई शान्ति, अमनचयनमा सघाउ पुर्‍याउन अपिल गरिएको छ । यसका साथै सुन्धाराको मदानी मस्जिदमा तोडफोडमा घटनाको सत्यतथ्य जाँचबुझ गर्न अन्तरधार्मिक राष्ट्रिय सञ्जालले सरकार समक्ष अपिल गरेको छ।

नेपालको संविधानले समेत कुनै पनि धार्मिक केन्द्रमा कसैले आघात पुर्‍याउन नपाइने भएकाले यसको सत्यतथ्य जाँचबुझ गर्न सञ्जालले विज्ञप्तिमार्फत अपिल गरेको हो। ‘नेपाल एउटा धार्मिक एकता र धार्मिक सहिष्णुताका मूल्य मान्यताको आधारमा शदीयौंदेखि इतर धर्मबीच समन्वय कायम राख्ने राष्ट्रको रूपमा परिचित देश हो,’ विज्ञप्तिमा लेखिएको छ, ‘आम नेपालीले यस मान्यतालाई अंगीकार गर्दै आइरहेका छन्।

कुनै पनि धार्मिक आस्थाका केन्द्रमा कसैले पनि खलल पार्न नहुने नेपालको संविधान २०७२ मा समेत स्पष्ट उल्लेख छ। त्यसैले यस घटनाको सत्य तथ्य बुझी नेपाल सरकारले न्यायपूर्ण निर्णय लियोस्।’