रोजगारी गुमाएर स्वदेश फर्किएकालाई कृषि सामाग्री प्रदान

देशपाेष्ट/काठमाण्डाैं । खोटाङको दिक्तेल रुपाकोट मझुवागढी नगरपालिकाले विदेशमा रोजगारी गुमाएर स्वदेश फर्किएका युवाहरुलाई कृषि सामाग्री वितरण गरेको छ । विश्वव्यापी महामारीको रुपमा फैलिएको कोरोना भाइरसका कारण विदेशमा रोजगारी गुमाएर स्वदेश फर्किएका युवाहरुलाई आफ्नै ठाउँमा कृषि कार्यको व्यवसायिक उत्पादन गरि स्वरेजगार बनाउन नगरपालिकाले कृषि सामाग्री वितरण गरेको हो ।

दिक्तेलमा आयोजित एक कार्यक्रममा नगरपालिकाको आर्थिक वर्ष २०७७/०७८ को स्वीकृत कृषि विकास सम्बन्धी (नेपाल कृषि सेवा विकास कार्यक्रम–प्रयास नेपाल)बाट हस्तान्तरित कार्यक्रम अन्तर्गत बिहीबार  स्वदेश फर्किएका युवाहरुलाई व्यवसायिक कृषि खेती गर्दा आवश्यक पर्ने विषादीसहित थोपा सिचाईँ सेट, आईएम सामग्री, सिलपौलिन प्लाष्टिक टनेल लगायतका सामग्री र सिंचाइ पोखरीका लागि प्लाष्टिक सहयोग कार्यक्रम अन्तर्गत २० जनालाई व्यवसायिक तरकारी खेती गर्नलाई बर्षाको पानी संकलन गर्न प्लाष्टिक वितरण गरिएको हाे ।

व्यवसायिक कृषिमा युवाहरुको आकर्षण बढाई स्थानिय स्तरमा नै रोजगारी सिर्जना गरि दिगो आर्थिक विकासको अवधारणा अनुसार स्वदेश फर्किएका युवाहरुलाई गाउँमै कृषि पेशामा स्थापित गराउन  उक्त कृषि सामग्री उपलब्ध गराएको दिक्तेल रुपाकोट मझुवागढी नगरपालिकाका नगरप्रमुख दिपनारायण रिजालले बताए ।

व्यवासायिक कृषि खेतीको लागि माटोको गुणस्तर पहिचान गरि माटो अनुसारको उपर्युक्त बालि लगाउन प्रत्येक वडामा माटो परिक्षण आवश्यक भएको र त्यसका लागि नगरपालिकाले प्रत्येक वडालाई मङ्सिर ६ गते माटो परीक्षण मेसिन प्रदान गरिने पनि मेयर रिजालले बताए ।

कृषि सामाग्री वितरण कार्यक्रममा उपप्रमुख विणादेबी राई, प्रमुख प्रशासकीय अधिकृत टेकथान दाहाल लगायतको उपस्थिति रहेको थियो ।

(तस्विरः उपमेयर विणा देवी राईको फेसबुकबाट)