तातोपानीको मुल पुनः पलायो

देश पोष्ट खोटाङ । महाभुकम्पपछि सुकेको रसुवाको एउटा तातोपानी कुण्ड पुनः पलाएर भरिएको छ । २०७२ सालको महाभुकम्पपछि आमाछोदिङ्मो गाउँपालिका–५ तातोपानीस्थित यो कुण्ड सुकेको थियो ।

गत भदौ मध्यतिर पलाएको तातोपानी गतबर्ष माघमा सुकेको थियो । स्थानीय नोर्चेल तामाङले बताए अनुसार ८ महिनापछि अहिले पुनः तातोपानी पलाएको हो । उनका अनुसार ६ वटै धारामा पानी आइरहेको छ । अहिले पानीको मात्रा पनि बढिरहेको छ । उक्त कुण्डमा पानी पुनः देखिन थालेपछि स्थानीय खुसी भएका छन् भने गुमेको व्यवसाय पुनः फर्किनेमा आशावादी भएका छन् । भुकम्पपछि तामाङ सम्पदा मार्ग र तातोपानी कुण्डको पानीको मुहान हराएपछि धार्मिक तथा साँस्कृतिक परम्परादेखि व्यवसायिक कारोबार समेत प्रभावित भएको थियो ।

तातोपानी पोखरीमा नुहाएमा छालासम्बन्धी रोग, शरीरको खटिरा, दम, गानो गोला बाथ, चर्मलगायतको रोगबाट ग्रसित बिरामी ठिक हुने विश्वास रहेको छ । तातोपानी कुण्डमा नुहाउन स्वदेशी मात्र नभएर बिदेशी पर्यटन समेत आउने गर्छन् । २ हजार ६ सय ४५ मिटरको उचाइमा अवस्थित तातोपानी कुण्डलाई भुकम्पको कम्पनले पु¥याएको क्षतिपश्चात पुनः पहिलेको अवस्थामा फर्किदैछ ।

यो कुण्डमा भुकम्पअघिसम्म ४० डिग्री सेन्टिग्रेट तापक्रम र प्रतिसेकेन्ड सय लिटर हाराहारीमा पानी निस्कने गरेको अनुमान छ । तातोपानीको मुहान सुकेपछि व्यापारिक प्रयोजनाका लागि लाखांै रुपैयाँ खर्चेर बनाएका होटल सुनसान भएका थिए । पर्यटक नआउँदा केहीँले त होटल व्यवसाय छोडी सकेका छन् । अहिले उक्त कुण्ड पुन: पलाएपछि स्थानिय खुशी भएका छन् ।