मुकेश कायस्थलाई राष्ट्रिय शहीद घोषणा

देश पोष्ट /खोटाङ । सरकारले जिउँदो शहीद भनेर चिनिएका मुकेश कायस्थलाई राष्ट्रिय शहीद घोषणा गरेको छ ।

मंगलबार बसेको मन्त्रिपरिषद् बैठकले कायस्थलाइ सहिद घोषणा गर्ने निर्णय गरेको हो।

२०६२–०६३  को दोस्रो जनआन्दोलनका क्रममा २७ चैत २०६२ मा प्रहरीले चलाएको गोली लागेर घाइते भएका काभ्रेका कायस्थको २०८० वैशाख २८ मा निधन भएको थियो ।

जनआन्दोलनताका कायस्थ बनेपाकै विद्यासागर स्कुलमा कक्षा ८ मा पढ्दै थिए ।  लोकतन्त्रका खातिर जनआन्दोलन भइरहँदा २०६२ चैत २७ गते उनी  बनेपाको तीनदोबाटोमा बायाँ कञ्चटमा सुरक्षाकर्मीको गोली लागी गम्भीर घाइते भएका थिए ।  त्यस दिनदखि उनी  अचेत थिए। कायस्थको बायाँ हात  राम्रोसँग चल्दैनथ्यो । गोलीको घाउ निको भए पनि टाउकोमा गहिरो घाउ थियो ।

गोलीका कारण उनी अचेत बनेका उनलाई ११ महिनासम्म अस्पतालमा राखिएको थियो।