के हो कसैलाई पछि नपारौं/नछोडौं परियोजना ?

देश पोष्ट /खोटाङ । जिल्लामा क्रियाशिल सामाजिक संस्था बाल सेवा समाज नेपाल खोटाङले यु.एन.डी.पी.को आर्थिक सहयोगमा खोटाङ जिल्लाको दिक्तेल रुपाकोट मझुवागढी नगरपालिकामा Leave No One Behind (LNOB) कसैलाई पछि नपारौं/नछोडौं परियोजना सञ्चालनमा ल्याएको छ ।

विश्वमा देखिएको मानवीय जटीलता, वातावरणीय असन्तुलन, सामाजिक आर्थिक चुनौतीहरुलाई ध्यानमा राखी विश्वका १९३ राष्ट्रहरुले विश्वव्यापी समृद्धि, साझेदारीता, र दिगोपनालाई ध्यानमा राखी सन् २०१५ सेक्टेम्बर २५ मा नेपाल सरकारले पनि पक्ष राष्ट्रको रुपमा सन् २०३० सम्ममा १७ वटा विभिन्न दिगो विकासका लक्ष्यहरु हासिल गर्ने प्रतिवद्धता जनाइसकेको छ ।

नेपाल सरकार पनि उक्त लक्ष्य प्राप्तिमा केन्द्रित भइरहेको सन्दर्भमा खोटाङ खोटाङ जिल्लामा भने संस्था मार्फत उक्त परियोजना कार्यान्वयनमा ल्याइएको परियोजना प्रबन्धक युवराज रिजालको भनाई रहेको छ ।

दिगो विकास लक्ष्यद्वारा संकल्पित पाँच मुख्य तत्वहरु  विश्वव्यपी शान्ति, समृद्धि, पृथ्वीको रक्षा, साझेदारीता, र मानवको अस्तित्व जोगाउने सन्दर्भमा गरिएको प्रतिवद्धताको कार्यान्वयनमा विश्व नै होमिएको वेला यो परियोजनालाई खोटाङ जिल्लामा सबै पक्षबाट निकै महत्व र चासोका साथ हेरिएको छ ।

विशेष गरी अति विपन्न घर परिवार, अपाङ्गता भएका व्यक्ति, जेष्ठ नागरिक, एकल महिला, असक्त, असहाय दलित घर परिवार, बञ्चितिकरण, बहिष्करण, हिंसा पिडित र जोखिममा परेका वर्ग र समुदायको न्याय, स्रोत, अवसर, शासन र प्रशासनमा पहुँच स्थापित गर्न सबै सरोकारवालाहरुले निर्वाह गर्नुपर्ने भूमिकाको सन्दर्भलाई लिएर परियोजना कार्यान्वयनमा रहेको परियोजना प्रबन्धक रिजालले बताउनुभयो ।

नेपाल एक वहुजातीय वहुभाषिक विविधतायुक्त राष्ट्र हो । यो विविधता शासन र प्रशासनमा दुवैमा झल्किन आवश्यक छ । यसका लागि सबै सरोकारवालाहरुले जिम्मेवार र भुमिका निर्वाह गर्न सके मात्र सो कुरा सम्भव हुने ठहरका साथ परियोजना कार्यान्वयनमा ल्याइएको हो ।

परियोजनाले सामाजिक समावेशीकरणमा जोड दिदैं बञ्चितिकरण र बहिष्करणमा परेका, राज्यद्वारा प्रदत्त हक, अधिकार, सेवा सुविधा र अवसरबाट बञ्चित, राज्यको मुल धारमा समाहित हुन नसकेका, स्रोत साधनबाट पाखा लागेका, पछाडि परेका र पारिएका वर्ग र समुदायको अर्थपूर्ण राजनीतिक, आर्थिक, सामाजिक, शैक्षिक, सांस्कृतिक सहभागिताको पक्षमा वकालत गर्दछ ।

यस्ता वर्ग र समुदायको न्यायोचित र अर्थपूर्ण सहभागिताको लागि स्थानीय सरकार, राजनीतिक दल, सञ्चारकर्मी तथा आम सरोकारवालाहरुको सहकार्य, समन्वय र सक्रियतामा संयुक्त रुपमा विशेष अभियानहरु नृतृत्वदायि र निर्णायक भुमिकाको अपेक्षा गर्दछ ।
परियोजना कार्यान्वयन कै क्रममा यस अघि दिक्तेल रुपाकोट मझुवागढी नगरपालिकाका निर्वाचित जनप्रतिनिधीहरु, तथा विभिन्न संघ संस्थामा आवद्ध सरोकारवाहरुलाई परियोजनाको अभिमुखीकरण र सामाजिक समावेशीकरण सम्बन्धी तालिम प्रदान गरिसकेको छ ।

मिति २०८० भाद्र १५ गतेका दिन खोटाङ जिल्ला स्थित विभिन्न स्थापित सञ्चारगृह तथा एफ.एम. रेडियो र स्थानीय तथा राष्ट्रिय छापा तथा विद्युतीय सञ्चार माध्ययमका १८ जना पत्रकारहरुलाई पनि यस विषयमा अभिमुखीकरण कार्यक्रम सम्पन्न गरेको छ ।

अभिमुखीकरण पश्चात् सहभागीहरुले त्यस्ता वर्ग र समुदायको पक्षमा आफ्नो कलम चलाउने र २ महिना भित्र कम्तीमा प्रति सञ्चारगृह एक एक वटा समाचार प्रकाशन वा प्रसारण गर्ने प्रतिवद्धता सहित कार्ययोजना समेत निर्माण गरिएको छ ।

कार्यक्रममा नगर प्रमुख तीर्थराज भट्टराईले परियोजना अत्यन्त सान्दर्भिक रहेकाले नगरपालिकाको तर्फबाट सक्दो साथ सहयोग रहने वचनवद्धता व्यक्त गर्नु भएको थियो ।

परियोजनाले निकट भविष्यमा जिल्ला स्थित राजनीतिक दलका नेतृत्व तहका निर्णायक व्यक्तित्वहरुलाई पनि विविध विषयमा तालिम प्रदान गरिने संस्थाकी अध्यक्ष चन्द्रकला भूजेलले बताउनु भएको छ ।

परियोजनाले प्रत्यक्ष रुपमा १२० जना र अप्रत्यक्ष रुपमा ३०६ जना त्यस्ता जोखिममा परेका वर्ग र समुदायको लागि काम गर्ने लक्ष्य राखेको छ ।

परियोजना १ श्रावण २०८० बाट सुरु गरिएको र करीब ५ महिना पौष मसान्त २०८० सम्म कार्यान्वयनमा रहने परियोजना प्रबन्धक युवराज रिजालको भनाई रहेको छ ।