संकटकोबेला सरकारलाई सहयोग गर्न नेकपा खोटाङको अपिल,क्वारेन्टाइनको लागि पार्टी कार्यालय उपलब्ध गराउने घोषणा ।

१३ चैत्र २०७६–खोटाङ । नेपाल कम्यूनिष्ट पार्टी (नेकपा) खोटाङले क्वारेन्टाइन बनाउन आफ्नो दिक्तेको भवनगैह्रमा रहेको तिनतले पक्की पार्टी कार्यालय उपलब्ध गराउने घोषणा गरेको छ ।

कोरोना भाइरसको संक्रमणका कारण बिश्वनै महामारीमा रहेको बेला मुलुकमा स्वास्थ्य संकट सिर्जना भएको भन्दै नेकपा खोटाङले दिक्तेलको भवनगैरामा रहेको पुष्पपाल स्मृति भवनलाई क्वारेन्टाइनकारुपमा उपयोग गर्नका लागि उपलव्ध गराउने घोषणा गरेको जानकारी दिएको छ ।

नेकपाका अध्यक्ष देवान किराती पृथ्बी र सचिव रामप्रसाद दंगालले प्रेस विज्ञाप्ती जारी गर्दै संकटको घडीमा राज्यको हरेक कदममा साथ दिनु राजनैतिक पार्टी, संघसंस्था र जनताको दायित्व भएकाले आवश्यक परेको अवस्थामा क्वारेन्टाइनका रुपमा उपयोगका लागि आफ्नै पार्टी कार्यालय दिने घोषणा गरेको जानकारी दिएका छन् ।

नेकपाको यस घोषणासँगै तीन तले पक्की भवन क्वारेन्टाइनका लागि उपयोग गर्न सकिने भएको छ । ‘मुलुकमा यसबेला स्वास्थ्य संकटकाल लागू भएको छ । सम्पूर्ण सम्पत्तीमाथि राज्यको नियन्त्रण हुन्छ । राज्यले आवश्यक ठानेको अवस्थामा निजी सम्पत्ती उपयोग गर्न सक्छ,’ विज्ञाप्तीमा भनिएको छ, ‘संकटको यो घडीमा राज्यलाई साथ दिनु सबैको दायित्व हो । यो महामारीको सामना गर्न राज्यलाई जस्तोसुकै सहयोग गर्न प्रतिवद्ध छौँ ।’ नेकपाले संकटको घडीमा सरकारलाई सहयोग गर्न अपिल गरेको बिज्ञप्ती मार्फत जनाएको छ ।