कोरोना संक्रमित बि.क.को निधनको बिषयमा नेकपा एमाले सहित अन्य संघ सस्थाद्धारा छानबिन गर्न माग ।

देश पोष्ट/ खोटाङ । जिल्लाको हलेसी तुवाचुङ नगरपालिका–७ महादेवस्थान घर भएका कोरोना संक्रमित शुक्र बि.क.को निधनको बिषयमा नेकपा एमाले सहित अन्य संघ सस्थाद्धारा छानबिन गर्न माग गरेको छ ।

हलेसी तुवाचुङ नगरपालिका–७ महादेवस्थानस्थित होटलमा निर्माण गरिएको आइसोलेसन सेन्टरमा समयमा उपचार नपाउँदा एमाले जिल्ला कमिटि सदस्य शुक्र विश्वकर्माको मृत्यु भएको दावी गर्दै एमाले खोटाङले छानविनको माग गरेको हो ।

संक्रमण पुष्टि भएपछि ८ दिनसम्म आइसोलेसनमा बसेर घर गएपछि पुःन स्वास्थ्यमा समस्या आएको भन्दै आइसोलेसन सेन्टर पुगेका विश्वकर्माको समयमा उपचार एबं अक्सिजन नपाएर असार १५ गते निधन भएको परिवारको दाबी रहेको छ ।

एमाले जिल्ला अध्यक्ष रामप्रसाद दंगालले बिहिबार शोक विज्ञाप्ति जारी गर्दै आइसोलेसनमा बसेका विरामीलाई कोभिड पोजिटिभ हुँदाहुँदै रेफर गरी घर पठाइनु र असहज भएपछि भोलीपल्ट आइसोलेसन आउँदा समयमै उपचार नपाएको भन्ने विषयले पार्टीको गम्भीर ध्यानाकर्षण भएको जनाउनु भएको छ ।

हलेसी तुवाचुङ नगरपालिका–७ महादेवस्थान घर भएका विश्वकर्मा नेपाल उत्पिडित जातीय मुक्ती समाजका केन्द्रीय सदस्य एवं जिल्ला अध्यक्ष पनि हुन् । संक्रमितको आइसोलेसनमै मृत्यु भएको सन्दर्भमा पार्टीले पनि आन्तरिक रुपमा गम्भीरतापूवर्क छानविन गरी सत्यतथ्य सार्वजनिक गर्ने शोक विज्ञाप्तीमा उल्लेख छ । ‘उहाँको असामयिक निधनका सन्दर्भमा केही गम्भीर विषयहरु विभिन्न सञ्चार माध्यमबाट उजागर भइरहेका छन् ।

यस विषयमा हाम्रो पार्टीको गम्भीर ध्यानाकर्षण भएको छ । यस विषयले पार्टीलाई थप पीडा महसुस भएको छ । यस सन्दर्भमा पार्टीले आन्तरिक रुपमा गम्भीरतापूवर्क छानविन गरी सत्यतथ्य सार्वजनिक गर्ने नै छ,’ शोक विज्ञाप्तिमा भनिएको छ, ‘तथापी महामारीको यस्तो चपेटामा स्वास्थ्य सेवाजस्तो संवेदनसिल विषयमा उठेका यी गम्भीर विषयमा सम्वन्धित निकायले तत्काल छानविन गरी दोषी उपर कारबाही गर्न र के कसो भएको हो सो को निष्पक्ष र सत्यतथ्य सार्वजनिक गर्नका साथै दोषी उपर कारबाही गर्न सम्वन्धित निकाय समक्ष माग गर्दछ ।’ एमालेले विश्वकर्मा निधनले पार्टीलाई अपुरणिय क्षती भएको भन्दै शोक व्यक्त गरेको छ ।

यस्तै, नेपाल उत्पीडित जातीय मुक्ति समाजले पनि स्वास्थ्यकर्मीको हेलचेक्राईँले शुक्र विश्वकर्माको मृत्यु भएको बुझिएको जनाएको छ । समाजका प्रदेश नम्बर १ का सह–इन्चार्ज चर्चबहादुर विश्वकर्मा, जिल्ला उपाध्यक्ष रमेश परियार र सचिव दिपक ठटालले जारी गरेको शोक विज्ञाप्तिमा संक्रमितलाई ‘अक्सिजन सकियो अस्पतालमा व्यायभार हुन्छ’ भनेर घर पठाउँदा भएको हेलचक्र्याइँले मृत्यु भएको नेपाल उत्पीडित जातीय मुक्ति समाजले जनाएको छ ।