किरात राई खेलकुद संघ केन्द्रीय कार्य समितिको अध्यक्षमा सञ्जयकुमार राई सर्वसहमत चयन

देश पोष्ट /खोटाङ । किरात राई खेलकुद संघ केन्द्रीय कार्य समितिको अध्यक्षमा सञ्जयकुमार राई चयन हुनुभएको छ।

खोटाङको दिक्तेलमा बुधबार सम्पन्न तेश्रो राष्ट्रिय अधिबेसनबाट राई अध्यक्षमा सर्वसहमत चयन हुनुभएको हो ।

संघको उपाध्यक्षमा रमा राई, नइन्द्र राई, सुर्यकुमारी सुनुवार राई, महासचिवमा मोतीचन्द्र राई, सचिवमा प्रविण कुलुङ राई र कोषाध्यक्षमा सुमन राई चयन भएका छन् ।

सदस्यहरुमा देउधन राई, कुमारी राई, सार्जन राई, निर्मला राई, बिक्रम राई, देबु राई, चन्द्रकुमार राई, डेनिका राई, भुवन राई, मेघराज राई, सुजता राई र नारदमणी राई चयन भएका छन् ।

अधिबेशनले किरात समुदायका खेलाडीको हकहित, कल्याण र रोजगारीको उचित व्यवस्थाको लागि तीनै तहको सरकारले निशर्त सेवा सुविधा उपलब्ध गराउनुपर्ने, इतिहास, भुगोल, सभ्यता, संस्कृति र पहिचानको आधारमा प्रदेश १ को नामाकरण किरात प्रदेश राख्नुपर्ने, किरात राई समुदायको उद्गम स्थल तुवाचुङ जायजुमको उचित संरक्षणको पहल गर्नुपर्ने, किरात समुदायको ऐतिहासिक स्थल खुवालुङमाथि भइरहेको सरकारी अतिक्रमण रोक्नुपर्ने, किरात समुदायको मातृभाषामा पठन–पाठनको व्यवस्था गर्नुपर्ने लगायतका १० बुँदे दिक्तेल घोषणा–पत्र जारी गरेको छ ।

महाधिवेशनको प्रदेश १ का समाजिक विकास मन्त्री राजन राईले उद्घाटन गर्नुभएको थियो ।

महाधिवेशनको उद्घाटन सत्रमा १३ औं दक्षिण एसियाली खेलकुद(साग) प्रतियोगिताका विजेता खेलाडीहरुलाई जनही दश हजार नगद सहित सम्मान गरिएको थियो।

साथै, पत्रकार उत्तम चौलागाँईलाई नगद १५ हजार ५ सय ५५ रुपैयाँको किरात राई खेलकुद पत्रकारिता पुरस्कार प्रदान गरिएको छ ।