सिन्धुलीमा बस दुर्घटना हुँदा ५ जनाको मृत्यु

देश पोष्ट /खोटाङ । सिन्धुलीको फिक्कल गाउँपाालिका–४ को कुहिभीरमा आइतबार बस दुर्घटनामा परी पाँच जनाको घटनास्थलमै मृत्यु भएको छ ।

ओखलढुंगाबाट काठमाडौं जाँदै गरेको बा २ ख ६५९६ नम्बरको बस दुर्घटना हुँदा पाँच जनाको घटनास्थलमै मृत्यु भएको हो । मृत्यु हुनेमा दुई पुरुष, दुई महिला र एक बालक रहेका छन् ।

३४ जना यात्रु सवार बस दुर्घटना हुँदा २९ जना घाइते भएको प्रारम्भिक विवरण आएको र उनीहरुको खुर्कोटस्थित अस्पतालमा उपचारका लागि पठाइएको जिल्ला प्रहरी कार्यालय सिन्धुलीले जनाएको छ ।

सडकको भित्तामा ठोक्किएर बस दुर्घटना भएको प्रारम्भिक आकलन छ ।
दुर्घटना भएको बस भित्तामा चेपिएर रहेकाले उद्धारमा कठिनाइ भइरहेको छ । मेसिन लगाएर दुर्घटना भएको बसलाई उठाउने प्रयास भइरहेको प्रहरीले जनाएको छ । दुर्घटनाको थप विवरण भने आउन बाँकी छ