‘दिप्रुङ लिफ्टिङ खानेपानी आयोजना’ को काम ४० प्रतिशत पूरा

देश पोष्ट /खोटाङ । ‘दिप्रुङ लिफ्टिङ खानेपानी आयोजना’ को काम ४० प्रतिशत पूरा भएको सङ्घीय खानेपानी तथा ढल व्यवस्थापन आयोजनाको कार्यालय खोटाङले जनाएको छ ।

दिप्रुङ चुइचुम्मा गाउँपालिका–४ बतासेका ८०० घर स्थानीय उपभोक्तालाई खानेपानी उपलब्ध गराउनेगरी शुरु गरिएको आयोजनाको नेपाल सरकार, सङ्घीय खानेपानी तथा ढल व्यवस्थापन मन्त्रालय सिंहदरबारको भ्याटसहित रु ३१ करोड १८ लाख ९२ हजार ६५६ लगानीमा डेढ वर्षअघि ‘दिप्रुङ लिफ्टिङ खानेपानी आयोजना’को काम ठेकेदारमार्फत शुरु गरिएको हो ।

सगरमाथ ड्रिलिङ एण्ड कन्ट्रक्शन प्रा.लि.ले निर्माणको काम ठेक्का लिएको दिप्रुङ लिफ्टिङ खानेपानी आयोजनाको काम ४० प्रतिशत पूरा भएको सङ्घीय खानेपानी तथा ढल व्यवस्थापन आयोजनाको कार्यालय खोटाङका प्रमुख ईन्जिनियर विपुलकुमार लाल दासले जानकारी दिनुभएको छ ।

वि.सं. २०७९ भदौमा सम्झौता गरिएको दिप्रुङ लिफ्टिङ खानेपानी आयोजना वि.सं. २०८१ भदौ–१८ गतेभित्र सम्पन्न गर्नुपर्ने दुई पक्षीय सम्झौतामा उल्लेख छ । दिप्रुङ लिफ्टिङ खानेपानी आयोजना दिक्तेल–गाईघाट सडकखण्डको भण्डारेघाटस्थित सुनकोशी नदीबाट पम्पमार्फत तानिने पानी लिफ्टि गर्दै बतासेमा पु¥याएर वितरण गर्ने योजना रहेको छ ।

भण्डारेघाटमा तीन लाख लिटरको एउटा ट्याङ्की र फिल्टरिङ (प्रशोधन) गर्ने ठाउँ निर्माणको काम सम्पन्न भएको छ । सुनकोशीको पानी तान्न पाँच ठाउँ लिफ्ट गरिन्छ । साढे तीन किलोमिटरमाथि मुसुरीडाँडामा ७५ र रातमाटामा ३० हजार लिटरको ट्याङ्की निर्माण गरेर त्यसमा जम्मा गरिएको पानी स्थानीय बासिन्दालाई वितरण गर्ने योजना छ ।

मुसरीडाँडामा वितरण लाइनको तीनवटासँगै मेन लाइनको ट्याङ्की निर्माण गरिसकिएको छ । वितरण लाइनमा छवटा ट्याङ्की निर्माण गर्नुपर्ने सम्झौतामा उल्लेख छ । चारवटा बनिसक्यो । दुईवटा बाँकी छ आगामी वैशाखभित्र सबै ट्याङ्की निर्माण सम्पन्न हुने हुन्छ ।”

लिफ्टिङ लाइनमा ५० हजार लिटर क्षमताको छवटा ट्याङ्की निर्माण गरिने आयोजना प्रमुख राईले जानकारी दिनुभएको छ । “एउटा बनिसक्यो । एउटा बन्दै छ । बाँकी चारवटा पनि चाँडै सम्पन्न गर्ने तयारीमा छौँ”, उहाँले भन्नुभयो, “पाँचवटै मेनलाइनको ट्याङ्की रहने ठाउँमा सुरक्षागार्ड हाउस पनि निर्माण गर्नुपर्नेछ । आयोजना सञ्चालनमा आएपछि त्यहाँ रहने सुरक्षागार्डले रेखदेखको काम गर्छ ।”

सगरमाथा राष्ट्रिय राजमार्गको भण्डारेघाटस्थित सुनकोशीको पानीलाई १५० एमएमको फलामे पाइपमार्फत लिफ्ट गरेर निकालिने खानेपानी आयोजनाको काममा तीन (समूह) कामदार खटाइएको ठेकेदार कम्पनीले जनाएको छ । लिफ्टिङ लाइनमा बिच्छ्याइने फलामे पाइपको काम सम्पन्न गरेर वितरण लाइनको काम शुरु गरिएको आयोजना प्रमुख सबिन राईले जानकारी दिनुभएको छ ।