नेकपा एमाले खोटाङद्धारा आठौँ जिल्ला अधिवेशनको नारा र लोगो सार्वजनिक

देश पोष्ट /खोटाङ । नेपाल कम्युनिष्ट पार्टी (एमाले) खोटाङले आगामी चैत्र २८ र २९ मा हुन लागिरहेको आठौँ जिल्ला अधिवेशनको नारा र लोगो सार्वजनिक गरिएको छ ।

जिल्ला अधिवेशनका लागि मङ्गलवार दिक्तेलमा पत्रकार सम्मेलन गरेर ‘सशक्त एमाले, सुदृढ सङ्गठन समृद्धिको आधार’ भन्ने मुल नारा सहितको लोगो सार्वजनिक गरेको हो ।

चैत–१२ गते बसेको जिल्ला कमिटी खोटाङको पूर्ण बैठकले आठौँ जिल्ला अधिवेशन सफल बनाउन जिल्ला अध्यक्ष रामप्रसाद दंगालको नेतृत्वमा ३३३ जनाको मूल व्यवस्थापन समिति र दशवटा उपसमिति गठन गरेको जिल्ला सचिव एवम् प्रचार विभाग प्रमुख कुमार आचार्यले जानकारी दिनुभयो । अधिवेशनका लागि ७९ वटा वडा र जनसङ्गठनका गरी ५६५ जना प्रतिनिधिहरु अधिवेशनमा सहभागी हुने एमालेले जनाएको छ ।

एमालेले आठौँ जिल्ला अधिवेशनमा सर्वसहमत नेतृत्व चयन गर्ने प्रयास भइरहेको जनाएको छ । आठौँ जिल्ला अधिवेशनमा वर्तमान अध्यक्ष दंगाल र उपाध्यक्ष देवबिक्रम राई अध्यक्षको आकांक्षी देखिनुभएको छ ।