सिंगापुर एयरलाइन्सको बोइङ ७७७–३०० इआर विमान मंगलबार दुर्घटना

देश पोष्ट /काठमाण्डौं । सिंगापुर एयरलाइन्सको बोइङ ७७७–३०० इआर विमान मंगलबार दुर्घटनामा परेको सिएनएनले जनाएको छ ।

सिएनएनका अनुसार लन्डनबाट सिंगापुर आइरहेको जहाज दुर्घटना हुँदा एक जना ७३ वर्षीय बेलायती नागरिक को मृत्यु भएको छ भने तीस जना घाइते भएको सिएनएनले उल्लेख गरेको छ ।

जहाजमा २११ जना यात्रु र १८ जना चालक दलका सदस्य रहेको बताइएको छ । एयरलाइन्सले भने विमानमा सवार मानिसको संख्याबारे खुलाएको छैन ।

१८ जना घाइते अस्पताल भर्ना भएका छन् भने अरू १२ जनाको उपचार भइरहेको छ । घाइतेमध्ये सात जनाको अवस्था गम्भीर भएको सिएनएनले उल्लेख गरेको छ । त्यस्तै बाँकी यात्रु र चालक दलका सदस्यको स्वास्थ्य परीक्षण भइरहेको एयरलाइन्सले जनाएको छ ।

’टर्बुलेन्स’ का कारण विमानमा गम्भीर गडबडी भएपछि सो विमान स्थानीय समय अनुसार अपराह्न ३ः४५ मा बैंककमा आपतकालीन अवतरण गरिएको थियो ।

जहाजबाट यात्रुहरूको उद्धार गर्न डेढ घन्टा समय लागेको थियो । दुर्घटनाका कारण विमान क्षतिग्रस्त भएको उल्लेख गरिएको छ ।