वाईसिएल खोटाङको सम्मेलनबाट किरातीको अध्यक्षमा ५५ सदस्यीय कार्यसमिती चयन

देश पोष्ट /खोटाङ । नेपाल कम्युनिष्ट पार्टी (माओवादी केन्द्र)को भातृ सङ्गठन वाईसिल नेपाल खोटाङको (बुधबार) राति सम्पन्न प्रथम जिल्ला सम्मेलन बाट भूपेन्द्र किरातीको अध्यक्षतामा ५५ सदस्यीय जिल्ला समिती चयन भएको छ ।

समितिको उपाध्यक्षमा चेवन बुधाथोकी, जीवनज्योति राई र मिनाकुमारी घिमिेरे (बुधाथोकी), सचिवमा सुजेन राई, सहसचिवमा विजय राई र राजेश प्रधान तथा कोषाध्यक्षमा वुद्धिकुमार राई चयन हुनुभएको छ ।

नवनिर्वाचित जिल्ला कार्यसमितिका पदाधिकारी तथा सदस्यहरुलाई वाईसिल नेपालका केन्द्रीय सदस्य एवम् खोटाङ जिल्ला ईन्चार्ज शुभलाल राई ‘आदेश’ले पद तथा गोपणीयताको शपथ ग्रहण गराउनुभएको छ ।

वाईसिएल नेपाल खोटाङको ५५ सदस्यीय जिल्ला कार्यसमितिमा एकजना महिला सहसचिवको पद भने, खाली राखिएको जनाइएको छ । खाली राखिएको पदमा जन्तेढुङ्गा गाउँपालिकाका वाईसिएल प्रतिनिधिबाट पदपूर्ति गरिने नवनिर्वाचित जिल्ला अध्यक्ष किरातीको भनाई रहेको छ ।

दिक्तेलस्थित जिल्ला समन्वय समिति खोटाङको समीक्षालय हलमा आयोजित जिल्ला सम्मेलनको उद्घाटन नेपाल कम्युनिष्ट पार्टी (माओवादी केन्द्र)का केन्द्रीय अनुशासन आयोगका अध्यक्ष एवम् पूर्व सांसद् टङ्क राईले गर्नुभएको थियो ।

उद्घाटन कार्यक्रममा माओवादी केन्द्रका केन्द्रीय सदस्यहरु समिता कार्की ‘अस्मिता’ र दुर्गाजयन्ती राई, वैकल्पिक केन्द्रीय सदस्य एवम् वाईसिएल खोटाङका फ्रयाक्सन इन्चार्ज ध्रुव बुढाथोकी ‘धिरेन’, माओवादी केन्द्र बागमती प्रदेशका अध्यक्ष सरल सहयात्री, प्रदेश उपाध्यक्ष देवान किराती ‘पृथ्वी’ लगायतका नेताहरुको सहभागिता रहेको थियो ।

वाईसिएल खोटाङका निवर्तमान अध्यक्ष किसान राई ‘दोबालिछा’को अध्यक्षतामा भएको उद्घाटनसत्रमा नेपाल तरुण दल खोटाङका जिल्ला अध्यक्ष काजीमान राई, युवा सङ्घ नेपाल खोटाङका सचिव सविन राई ‘विज्ञान’ लगायतले शुभकामना मन्तव्य राख्नुभएको थियो ।