मङ्सिर देखी हाल सम्म धरहराबाट ४ करोड बढी राजस्व सङ्कलन

देश पोष्ट /काठमाण्डौ । पुनर्निर्माण भएर गत मङ्सिर देखी सञ्चालनमा आएको धरहराबाट चार करोड ८३ लाख रुपैयाँभन्दा धेरै राजस्व सङ्कलन भएको जानकारी प्राप्त भएको छ ।

२०७२ सालको भूकम्पले पूर्णरूपमा क्षति पुगेपछि निर्माण सम्पन्न गरेर गएको मङ्सिर ९ गतेदेखि शुल्कसहित सञ्चालनमा ल्याइएको धरहराबाट यही असार २४ गतेसम्ममा चार करोड ८३ लाख ६५ हजार पाँच सय रुपैयाँ राजस्व सङ्कलन भएको अन्तरिम धरहरा सञ्चालन तथा व्यवस्थापन एकाइ सुन्धाराका प्रमुख महेश राईले जानकारी दिनुभयो ।

प्रमुख राईका अनुसार यस अवधिमा दुई लाख ६२ हजार पाँच सय ५५ जनाले धरहराको अवलोकन गरेका छन् ।

हप्ताको बुधवार बन्द रहने,अन्य दिन खुला रहने धरहरामा दैनिक झन्डै एक हजार दुई सय जना चढ्ने गरेको तथ्यांक रहेको छ ।

धरहरा चढ्न प्रतिव्यक्ति दुई सय रुपैयाँ शुल्क तोकिएको छ । विद्यार्थी, ज्येष्ठ नागरिक, बालबालिका, अपाङ्गता भएका व्यक्तिहरूले ५० प्रतिशत छुटमा धरहरा चढ्न पाउने व्यवस्था छ । सार्क राष्ट्रबाट आउने पर्यटकलाई प्रतिव्यक्ति पाँच सय र सार्कबाहेक राष्ट्रबाट आउने पर्यटकका लागि प्रतिव्यक्ति एक हजार रुपैयाँ शुल्क तोकिएको अन्तरिम धरहरा सञ्चालन तथा व्यवस्थापन एकाइ ले जनाएको छ ।