देशभर रेबिज खोपको अभाव, खोप नलगाँदा एक विरामीको मृत्यु

देश पोष्ट /काठमाण्डौं । देशभर रेबिज खोपको अभाव भएकाले रेबिज संक्रमणबाट बिरामीले मृत्युबरण गर्नुपर्ने अवस्था श्रृजना भएको छ ।

रेबिजका कारण काठमाडौँको चन्द्रागिरि नगरपालिकामा एकजनाको मृत्यु भएको छ । रेबिज संक्रमणकापछि शुक्रराज ट्रपिकल तथा सरुवा रोग अस्पताल (टेकु) मा भर्ना भएका एक ४८ वर्षीय पुरूषको उपचारका क्रममा गत शनिबार मृत्यु भएको हो ।

केही हप्ताअघि कुकुरले टोकेको ती पुरुषको स्थानीय स्वास्थ्य संस्थामा खोप उपलब्ध नभएको र परिवारले हेलचेक्र्याइँ गर्दा ती पुरुषको ज्यान गएको चिकित्सकहरूले बताएका छन् ।

सरकारी अस्पतालहरूमा रेबिजविरुद्धको खोपको चरम अभाव भए पनि स्वास्थ्य तथा खाद्य सुरक्षा मन्त्रालयले यसबारे सूचना बाहिर ल्याउन कडा रोक लगाएको नाम उल्लेख नगर्ने शर्तमा अधिकारीहरु बताउँछन् ।

अहिले रेबिजका बिरामीहरु महँगो मूल्य तिरेर निजी औषधि पसल (फार्मेसी) बाट खोप किन्न बाध्य छन् । टेकु मात्र नभई देशभरका अधिकांश सरकारी स्वास्थ्य संस्थाहरूमा विगत केही महिनादेखि रेबिजविरुद्धको खोपको तीव्र अभाव छ ।

खोप अभावका कारण सर्वसाधारणको जीवन उच्च जोखिममा परेको छ । एकपटक लक्षण देखिएपछि यो रोग सधै घातक हुने चिकित्सकहरु बताउँछन् । मयमै खोप लगाए उपचार हुने भएकोले अभाब समाधान गर्न सम्बन्धित निकायको ध्यान जान जरुरी छ ।